"Susto handia izan da, baina zorionez ondo gaude", idatzi du Jaurlaritzako Ekonomiaren Garapeneko sailburuak bere Twitterreko kontuan. Argentina eztabaida ekonomiko bizian murgilduta dago egunotan, eta Tapiak hitzaldi berezia eman du 2.000 lagunentzat Argentinako 24. Industria Konferentzian. Mauricio Macri presidenteak berak itxi du ekitaldia.
Kontua da Dante Sica Ekoizpen ministroak uko egin diola igogailu ofizialetan jaisteari, prentsari izkin egiteko, eta bigarren mailako batean jaistea erabaki duela, beste hainbat enpresarirekin eta ordezkarirekin batera, tartean Arantza Tapiarekin. Horrela azaldu du La Nación egunkariak. Igogailu horrek huts egin du, matxura bat tarteko, eta azken hamar metroko tartean erori egin da, ateak zabalik dituela.
Barrukoek kolpe batzuk jaso dituztela ere esan du egunkari horrek, baina arinak. Tapia bera zauri handirik gabe atera da, baina belaun batean kolpe bat jaso du. "Gure lan agendarekin jarraitzeko prest", txiokatu du sailburuak sare sozialean, jasotako elkartasun mezuengatik "eskerrak" eman eta gero.
Susto handia izan da, baina zorionez ondo gaude. Gure lan-agendarekin jarraitzeko prest. Eskerrik asko, bidalitako mezuengatik! https://t.co/wBhFyzG0Wypic.twitter.com/MkRNZqK2M4
— Arantxa Tapia (@arantxa_tapia) 5 de septiembre de 2018
Istripua izandako igogailuaren atea palanka eginez atera behar izan dituzte barrukoak, argazkian ikus daitekeenez.
