Uztailaren 7rako berritzen ez diren hitzarmen kolektiboak iraungi eta langile horiei Espainiako lan erreforma ezarriko zaie. Horregatik, "arduraz" jokatzeko eta egun hori baino lehen akordio bat egiteko eskatu die Eusko Jaurlaritzako Enplegu eta Gizarte Gaietako sailburu Juan Maria Aburtok sindikatuei eta patronalari.
Euskadi Irratian hitz egin du Aburtok. Esan du egoera "nahiko larria" dela, ez baitakite "zein izango den egoera" hitzarmen kolektiboak iraungitzen badira. "Ziurrenik, zalantzan jarriko da gizartearen kohesioa", iragarri du.
Jarduera ekonomikoak "segurtasuna" behar duela eta, akordiorik ezean, segurtasun hori "desagertu" egingo dela uste du Aburtok, akordioaren garrantziaz ohartarazteko.
Langabeziaz ere jardun du. Esan du lanik gabe dauden beharginen kopurua "izugarria" dela, baina gaineratu du "pixkanaka hobetzen" ari direla datuak.
