ARRANTZA. Jaurlaritza antxoa kuotak murrizteko prest dago

Europako Batzordeak Bizkaiko Golkoko antxoaren harrapaketa kuotak %85 murriztu nahi dituela eta, Galizia, Asturias, Kantabria eta EAEko administrazioetako arrantza arduradunak Santanderren bildu ziren atzo datorren astean Bruselan egitekoa den bilerarako jarrera adosteko. Batzordearen asmoei aurre egiteko, antxoa harrapaketak murrizteko proposamena adostu zuten. Datorren urteko lehen sei hilabeteetan gehieneko harrapaketa behin behinean 30.000 tonatik 20.000 tonara jaisteko prest agertu ziren. Eta proposamenaren arabera, udaberriro Eusko Jaurlaritzak eta Frantziako Gobernuak egiten duten ebaluazio bileran aztertuko litzateke 2005eko ekainetik aurrera zer egin.

Luis Miguel Macias Jaurlaritzako Arrantza sailburu ordearen arabera, proposamena «formula malgua da» eta aintzat hartzen ditu antxoaren egiazko egoera eta kaltetutako eremuen egoera sozioekonomikoa. Gainera, «zientifikoki oinarri handiagoa du», Maciasen ustez.