Autonomoen atxikipenak %15etik %21era igoko dira

Cristobal Montorok ez zuen gaiari buruz txintik ere esan, baina Espainiako Ministroen Kontseiluak atzo onartutako neurrien artean azaltzen da autonomoen eta profesional liberalen (abokatuak, arkitektoak...) atxikipenen igoera. Zehazki, orain, haien fakturen %15 atxiki beharrean, %21 atxikiko diete. Neurria behin-behinekoa da: 2012ko abuztuaren 1etik 2013ko abendura artekoa, alegia. Salbuetsita daude nekazariak, abeltzainak eta basozainak, %2ko zerga pagatuko baitute. Neurriak ez luke, teorian, eraginik izan behar Hego Euskal Herrian, Errenta Zergari dagokiolako eta horren gaineko eskuduntza dutelako Araba, Bizkai eta Gipuzkoako diputazioek eta Nafarroako Gobernuak.