Abhijit Banerjee, Esther Duflo eta Michael Kremer dira 2019ko Ekonomiako Nobel saridunak; lehengo biak Massachusetts Insitute of Technologyko irakasleak dira, eta Kremer Harvardekoa —AEBetan denak—. Hirurek jaso dute saria pobreziarekin lotutako lanengatik, txirotasuna gutxitzeko beren ekarpen esperimentalarengatik hain zuzen. Egungo erronka handienetako bat dela dio Suediako Bankuak, pobrezia gutxitzea alegia, eta saridunen ekarpena azpimarratu du, politika berriak ezarri ahal izateko.
Ekonomiari dagokion saria izan da aurtengo Nobel sarietan azkena, eta akademiak ematen ez duen bakarra. 1968az geroztik ematen du erakunde horrek Alfred Nobelen oroimenez. Bederatzi milioi koronako saria da, alegia, 831.000 eurokoa.
