Jose Maria Iruarrizaga Bizkaiko Ogasun diputatuak gaur Biltzar Nagusietan azaldu duenez, Bizkaiak ez dauka presarik gainbalioaren gaineko zergaren bere araudia Espainiako Auzitegi Konstituzionalaren azken ebazpenetara egokitzeko. Aldundiak ez du aldaketarik egingo gaiari buruz Euskadiko Zerga Koordinaziorako Organoan abian dagoen eztabaida amaitu arte.
Epaileek debekatu egin dute etxebizita edo lursail baten erosketatik salmentara galera dutenek eduki ez duten gainbalio batengatik zerga pagatu behar izatea. Arabak eta Gipuzkoak premiazko dekretu bidez aldatu behar izan dute zergara araudia, auzitegiak agindutakora egokitzeko. Bainak Iruarrizagaren arabera, Bizkaiak ez du halako premiarik, "Araban eta Gipuzkoan ez bezala, "Bizkaiko araudiaren inkostituzionaltasuna ezartzen duen epairik ez delako izan. Eta diputazioak ez du izan halako helegiteren berririk herrialdeko udaletatik".
Edonola ere, "egoera desberdina izanda ere" Iruarrizaga bat dator Araba eta Gipuzkoako aldundiekin, gainbalioaren gaineko zergak berrikuspen sakona behar duela esatean: "Euskal administrazio guztiak jabetzen gara horretaz, eta horregatik, Koordinazio Organoan ari gara lanean".
