Bizkaiko merkataritza sektoreko Cecobi patronalak —Cebeken barruan dena— ELA sindikatuak Bizkaidendak patronalarekin sinatutako hitzarmen kolektiboa salatu zuen orain hilabete batzuk, baina administrazioak ontzat eman zuen Bizkaiko sektorea arautzeko lan akordioa. Cecobik, ordea, auzitara jo zuen Bizkaidenden ordezkaritza ez zela nahikoa esanez, eta Bilboko epaitegi batek arrazoi eman eta gero, EAEko Justizia Auzitegi Gorenak berretsi egin du ebazpena. Cecobik berak eman du ezagutzera gaur.
Patronal horrek azken ebazpen hori ezagutu ondoren, esan du "frogatua" geratu dela "sektoreko langile gehienak enplegatzen dituen bazkide kopurura" ez dela iristen Bizkaidendak. Horiek horrela, ELAri esan dio ehungintzaren negoziazio mahaira eta akordioak ez dauden beste guztietara itzultzeko, merkataritzako itun kolektiboak berritu daitezen.
ELAk aspaldian salatu zuen Cecobik ez dituela Bizkaiko merkataritzaren lan hitzarmenak berritu nahi, eta blokeo hori askatzeko saio gisa Bizkaidendak patronalarekin adostu zuen arautegi berria. Epaileek, ordea, bertan behera utzi dute orain.
