Interes tasen jaitsieran interesik ez dute erakutsi txerritxo ehiztariek. Egoera okertu litekela esan du Vegara Espainiako ekonomia estatu idazkariak eta, Erresuma Batuan bertan, %15eko balio galera izaten ari dira etxebizitzak, azken urtean. Gauzak horrela, erosteko interes gutxi eta beherakorra, saltzeko interes anitz eta hazkorra. 2.643 milioiren salerosketa izan zen eta %6 pasa galdu zuen Ibex-35 indizeak, Santander, BBVA, Gas Natural edota Acerinoxek bezalaxe. Gamesak %16 pasa galdu zuen eta %12na pasa Iberia eta Accionak. Dirua erabat merkatzeak ez du inbertsiogilerik automatikoki erakartzen eta, aurriskupenak, ez dira berez ontzen. Fenosak (-%1,11) hobeto eutsi zion, Gas Naturalek irentsiko duen usteak bizirik dirauelako. Cisco Systemsen (-%4) mozkin berri txarrek Dow Jones Europako indizeen bide beretik bultzatu zuten eta Murdoch aberatsaren News Corp (-%16) komunikabide enpresa, antzera.
Fincas Corral. Prezioak seinale indartsuak dira. Alokairua garestia dela diotenei arrazoia kendu asmoz, Fincas Corral etxeak zortzi mila etxe eskaintzen ditu alokairuan; bermerik gabe, bi hilabetez doan eta soldata bat izatearen frogagiri bakarraren truk..
ING. Union Fenosan %3ko partaidetza duela jakinarazi du ING bankuak. Aste gutxiren barruan, litekeena da Erosteko Eskaintza Publikoa (EEP) egitea 18,33 euroan. Alde horretatik, inbertsio ziur samarra dirudi orain 16,91 euroan erosteak.
Interesgarria izango zaizu
Nabarmenduak
