Inbertsiogileek elkarri urte berri ona opatzeaz batera, momentuz urteko berri onak ospatzeko aukera eskaini zuten atzo Ibex-35 indizeko debutariek: Telecincok %1,25 irabazi zuen eta Sacyr-Vallehermosok %1,89. Ez ziren bakarrak izan. Oporretatik itzulera profitatuz eta AEBetako ISM manufaktura indizeak uste baino maila hobea eman duenez, Edurnezuri, Sogecable, Indra, Acerinox eta ACS ere %1na pasa igo ziren. Metrovacesa, Gamesa eta Banesto berriz, %2na pasa garestitu ziren. Galera berri txarrenak Arcelor (-%2,44) altzairugileak, gas hornitzaileek (Gas Natural %0,35 eta Enagas %0,82 jaitsi ziren) eta Amadeus (-%0,92) txerritxoak eman zituzten. Gainontzean, irabaziak nagusi gurean nahiz Europako indizeen artean. Iazkoa bezain urte ona errepikatzea zaila izango den arren, inbertsiogileak itxaropentsu agertu dira burtsako akzioen bilakaerari buruz.Emaitzek esango dute.
-Edurnezuriren akziodunek ez diote Deutsche Telecom enpresak telefonia finkoan Espainian egingo dion konkurrentziari beldurrik. Ya.com aurten bertan da, Hego Euskal Herrian ere, lehian hastekoa.
-BBVA-k (+%0,61) azken urteetako joera aldatu eta, Banestok bezala, bulegoak irekitzen hasteko asmoa du. 300 milioi euro inbertituz 550 bulego zabaltzea espero du hiru urteotan, gehienak Espainian.
Interesgarria izango zaizu
Nabarmenduak
