Irtenbide eske Gasteizko kaleetara atera dira Condesako langileak. Martxaren amaieran, ohar bat irakurri dute, eta zuzendaritzari "kudeaketa ezin txarragoa" egitea egotzi diote. Langileen ustetan, plantak "bideragarriak" dira.
Horrekin batera, salatu dute enpresak ez diela informaziorik eman, eta kezka agertu dute taldea hartzekodunen konkurtsoan sar daitekeelako. Enpresak sei lantegi ditu: bi Legution (Araba) eta Lesakan, eta bana Berriobeitin (Nafarroa), Mieresen (Asturias) eta Sagunton (Valentzia). Guztira 1.000 langile ditu —660 Hego Euskal Herrian—. Lanpostu horien geroa zalantzan dago taldea konkurtso aurrekoan sartu delako.
"Lantaldeari egonkortasuna emango dioten proiektu industrialen alde gaude; ez dugu espekulatzailerik nahi", adierazi dute. Informazioarekin batera, "gardentasuna" eskatu dute. Egoera onbideratzen ez bada, mobilizazioekin jarraitzeko asmoa agertu dute.
