EBZ Europako Bankuak, hiru urtean itzultzeko, 529.531 milioi euro utzi dizkie euroaren eremuko 800 bankuri, gaur berak jakinarazi duenez. "Oso baldintza onetan" prestatu die dirua, %1eko interesarekin. Helburuak, haren arabera: bankuek euren herrialdeetako zor publikoa erostea, eta maileguak ematea herritarrei eta enpresei.
EBZk finantza erakundeei sekula utzitako diru kopururik handiena da, eta azken urteetako bigarren operazio handia du. Hain zuzen, iazko abenduan ia 500.000 milioi euro prestatu zizkien 523 bankuri, orduan ere hiru urtera itzultzeko baldintzarekin eta %1eko interesarekin.
