Huyck Wangner enpresak goizean kendu du erregulazio dosierra, Gipuzkoako Lan Delegazioan. Langileek harrituta hartu dute erabakia, baina zuhur ere, ez baitira enpresaren asmoez fio. Mesfidantza horri arrazoi eman dio arratsaldean Huyck Wangnerrek zabaldu duen agiri batek. Horretan dioenez, erregulazioa kentzearen arrazoia da langileekin negoziatu nahi dituela baldintzak, hilabetez egin duten negoziazioak ez duelako fruiturik eman. Enpresak berretsi du Zizurkilgo lantegia ez dela bideragarria, makineria zaharkituta duelako eta hori berritzeko dirurik ez dagoelako. "Dosierra aurkezteko arrazoi objektiboak indarrean daude", dio.
Zizurkilgo enpresako langileak greban izan dira enpresak lantegian produkzioa eten egingo zuela jakinarazi zuenetik. Mobilizazio ugari egin dituzte, azkenekoa joan den larunbatean bertan, Tolosan. Dosierra negoziatzeko epea astelehenean amaitu zen, eta prozesu horretan zuzendaritzak ezer hitzartzeko borondaterik ez duela izan ziurtatu dute langileen ordezkariek.
