«Ezin dut sinistu. Ezin dut sinistu», ziurtatu zuen Rodriguez Zapaterok, Bruselan zegoela. Zurrumurrua «sekulako erokeria» dela uste du Zapaterok, eta salatu egin du halako espekulazioek oso ondorio «larriak» dituztela, burtsa erorarazten dutelako eta Espainiaren zor publikoaren interes tasa igotzen dutelako.
Zapaterok ukatu egin du Espainiak nazioarteko laguntza behar izango duela bere zorrari aurre egiteko, eta gogorarazi du Europako Batasunaren batez besteko zorraren hogei puntu azpitik dagoela. Espainiako finantza sektorearen egoerari buruzko «funtsik gabeko iritziak» ere baztertu ditu. Espainiako kontu publikoen egoera txarrari buruzko hainbat artikulu kaleratu zituzten atzo ospe handiko egunkariek, eta gogorarazi zuten %11,2ko defizit publikoarekin bukatu zuela iaz.
Euroguneari buruzko mesfidantza bizkor hedatu zen atzo. Euroaren truke tasa ofiziala1,3089 dolarrean finkatu zuen Europako Banku Zentralak, mailarik txikiena iazko apirilaz geroztik. Europa osoko burtsak jaitsi ziren, baina askoz gehiago Atenaskoa (-%6,7) eta Madrilgoa(-%5,4).
Greba eguna gaur Grezian
Greziari buruzko zalantzak ere ez dira uxatu. Wolfgang Schaueble Alemaniako Finantza ministroa eta Josef Ackermann Deutsche Bankeko burua batera azaldu ziren atzo prentsaurrekora, eta esan zuten Alemaniako banku pribatuek aurrerantzean ere dirua utziko dietela Greziako Estatuari eta hango bankuei. Baina horrek ekar zezakeen lasaitasuna uxatu zuen Schauebleren gobernukide batek, Rainer Bruederle Ekonomia ministroak. Haren ustez, Greziak jasoko dituen 110.000 milioi euro horiek ez dira nahikoa izango hurrengo hiru urteotako diru beharrak asebetetzeko.
Grezian bertan, laguntza hori emateko NDFk eta Europako Batasunak inposatutako neurri zorrotzek hirugarren greba eguna eragingo dute gaur. Neurriek «gizartearen tolerantziaren muga gainditu dute, eta inork ez daki zer gertatuko den aurrerantzean», ohartarazi du Spiros Papaspiros Adedy funtzionarioen sindikatuko buruak.
Langile publikoek atzo hasi zuten greba. Jarraipen zabala izan zuen, hezkuntzan batez ere, eta aire garraioari ere eragin zion. Atenasko erdialdean milaka erretiratu, funtzionario eta irakasle elkartu ziren, Gobernuari atzera egiteko eskatzeko.
