Merkatuaren legeak dio produktu baten salmenta jaisten bada haren prezioa apaldu egingo dela, salmenta handitu dadin. Halakorik ez zen gertatu iaz etxebizitzekin. Hego Euskal Herrian %10,6 jaitsi zen bizitegien salerosketa, interes tasa handien ondorioz, baina, hala ere, etxe horien prezioak gora eta gora egiten du etengabe. INE Espainiako Estatistika Institutuak gaur argitaratutako datuen arabera, Araban, Bizkaian eta Gipuzkoan batez beste 2022an baino %3,5 garestiago izan dira etxebizitzak, eta %5,9 garestiago Nafarroan.
Egia da prezioen igoera moteldu egin dela 2022arekin alderatuz gero. Urte horretan %7,8 handitu ziren salerosketak Hego Euskal Herrian, eta antzeko mailan garestitu ziren: %7,3 Nafarroan eta %6,4 beste hiru lurraldeetan.
Etxe berrien prezioa garestitu da gehien: %10.9 Nafarroan, eta %6,1 Araban, Bizkaian eta Gipuzkoan. Gutxi gorabehera, saltzen diren hamarretik bi dira.
Bigarren eskukoak, aldiz, %3,7 garestitu ziren Nafarroan, eta %2,9 beste hiru lurraldeetan.
