Urtarrilaren 1etik apirilaren 30era 8.497 etxebizitza salerosi dira Hego Euskal Herrian, INE Espainiako estatistika erakundeak emandako datuen arabera. Iazko tarte horretan baino 784 gehiago dira (+%10,1).
Hazkunde ekonomikoaren eskutik, merkatua bizkortzen ari da. 2016tik 2017ra %5,1 hazi baitziren salmentak.
Edonola ere, etxebizitzen salmenta ez da duela krisia lehertu arte izan zuen kopurura hurbildu. 2008ko lehen lau hilabeteetan aurtengoan baino 1.093 gehiago saldu ziren (+%11,4) eta 5.436 gehiago 2007an (+%39,1).
Azken urtean lurralde guztietan igo da etxebizitzen salmenta, baina Araban besteetan baino gehiago (+%23). Nafarroan %9,5 handitu dira salerosketak, Bizkaian %9,1 eta Gipuzkoan, berriz, %7,8.
Etxe berrien salmenta gehiago hazi da (+%12,4) bigarren eskukoena baino (+%9,6). Edonola ere, Hego Euskal Herrian apirilera arte saldutako bost etxeetatik bakar bat zen berria.
Are txikiagoa da babes ofizialeko etxebizitzen kopurua: 963 baizik ez dira izan, merkatu osoaren %11,3. Iaz %12,4 izan ziren.
Prezioak ere, gora
Etxebizitzen salmenta handitu ahala ari dira prezioak ere handitzen. Joan den astean, INEk berak jakinarazi zuen aurtengo lehenengo hiruhilekoan 2017an baino %6,1 garestiago saldu zirela etxebizitzak Araba, Bizkai eta Gipuzkoan, eta %2,1 garestiago Nafarroan.
Kopuruan bezala prezioetan ere, etxebizitzen prezioek 2007an jo zuten goia, eta 2014an behea. Nafarroan %47 merkatu ondoren, eta Araba, Bizkai eta Gipuzkoan %40. Harrezkero, garestitzen ari dira prezioak: Nafarroan, %0,6 igo ziren 2015ean, %1,7 2016an, eta %2,2 iaz; Araba, Bizkai eta Gipuzkoan, berriz, %1, %2,6 eta %5,2.
