2005eko irailaren eta 2008ko maiatzaren artean Euriborrari buruzko kartel bat osatu zuten kontinenteko zazpi banku handik, Europako Batzordeak uste duenez. Finantza produktu deribatuen interes tasak hitzartu zituzten, eta informazio sekretua partekatu zuten. Horren ondorioz, Euribor indizea behar baino handiagoa izan zela eta kontsumitzaileei kalte egin ziela ziurtatu du Marghette Vestager Lehia komisarioak. Zehazki zenbateko kaltea izan zen zehazterik ez duela azaldu du Vestagerrek, baina bai irabazi handiak ekarri zizkiela bankuei.
2013an, 820 milioi euroko isun bat ordaintzeko akordioa lortu zuten lau bankuk Bruselarekin (Barclays, Deutsche Bank, RBS eta Societe Generale). Beste hiru bankuk ez zuten auzia orduan itxi nahi izan, eta haien aurkako ikerketa gaur bukatu du EBk. Euriborraren prezioa manipulatzeaz eta monopolioen aurkako arauak hausteaz errudun aurkitu ditu Batzordeak, eta isuna ezarri die: 337 milioi ordaindu beharko ditu JPMorgan Chase estatubatuarrak, 114 milioi Credit Agricole frantsesak eta 37 milioi, berriz, HSBC banku britainiarrak.
