Euskal Hirigune Elkargoko CGT sindikatuak grebarako deialdia egin du ostiral hontarako. Langileak lana uztera deitzen ditu, eta Jean Rene Etxegarai lehendakariarekin hitzordua eskatu du gehiengoa duen sindikatuak. Aldarrikapenak anitzak izan arren, argi utzi dute hitzordu bat egonez gero, greba bertan behera utziko dutela. Hamar Herri Elkargo ohietan langileek zituzten eskubideen galtzetik dator sindikatuaren aldarrikapen nagusia: "herri elkargo batean eskubide jakin batzu zituen langileak, Euskal Elkargoa sortu denetik, langilea poloz aldatzen dutelarik, zituen eskubideak galtzen ditu, eta polo berrikoak ez ditu eskuratzen". Langileen leku aldatzeak ugaritzen doazten heinean, geroz eta langile gehiagok zituzten eskubideak galtzen dituztela azaldu dute sindikalistek; berririk irabazi gabe. "Beldur gira ditugun eskubideak piskanaka galtzen joango girela, alde horretatik iduritzen zaigu orri txuri batekin hasi nahi dutela Elkargoaren ibilbidea", erran du Amato Euskal Hirigune Elkargoan CGTko idazkari nagusiak.
CGT sindikatua da Euskal Hirigune Elkargoan lehen sindikatua, hiru ordezkari ditu. Bigarren postuan CFDTek bi ordezkari ditu, eta azkenik LABek ordezkari bakarra. Beste sindikatuekin haien egitasmoa ez dutela partekatu azaldu du Amatok, eta horren inguruan posizio amankomunik duten ez daki.
