Idiazabalgo Jaso enpresak 32 langile kanporatuko ditu, eraikuntzako krisia arrazoi emanda

Idiazabalgo (Gipuzkoa) Jaso enpresak 32 langile kaleratuko ditu, erregulazio espedientearen bidez. Herenegun jakinarazi zieten langileei.

Nolanahi ere, langile batzordeak ez du erabakia onartu eta Eusko Jaurlaritzari eskatu dio ez dezala ontzat eman enpresaren eskaria. Jasoko langileei, berriz, greba mugagabea egitea proposatuko die. Enpresa batzordeak adierazi du eraikuntzaren loraldiak iraun duen bitartean plusbaliekin onura handiak lortu dituela enpresak, eta orain, beheraldia etorri denean, "galerak sozializatu" nahi dituela, langileen kalterako.

Dorre-garabiak egiten ditu Jasok Idiazabalgo lantegian, 1973tik. Jaso Taldea bera 1965ean sortu zen, garabiak eta polipastoak egiteko.