Kutxabankek urte osoan 114 lagun hautatu ditu horiei kontratu mugagabeak egin eta bere langile taldea osatzeko asmoz. Finantza taldeak jakinarazi duenez, haietatik gehienek jada bazuten lan harremana Kutxabankekin, eta beste 34k ez.
«Kontratatu berriak erakundearen jarduera eremu desberdinetan arituko dira lanean, eta, bereziki, bezeroarentzako arreta pertsonalizatua indartuko dute, bulego sarean integratzean», azaldu du Kutxabankek, eta gaineratu nabarmen handitu dela informazio teknologietan, datuetan eta horien kudeaketan ezagutza espezializatua duten beharginen eskaria.
Hurrengo urtean jendea kontratatzen jarraitu nahi du entitateak, eta 2024. urte bukaerarako 150 kontratatzera iristea aurreikusten du. Gaur egun, Kutxabanken langile taldeak 5.000tik gora behargin ditu, bankuaren zerbitzu espezializatuetakoak barne.