Zenbateko orokorrari erreparatuz gero, Bizkaia zen langabe gehien dituena; %7,90ekoa da langabezia tasa. Era berean, Bizkaian murriztu zen gutxien langabeen kopurua irailean (%0,19). Nafarroan, berriz,%6,55eraino jaitsi zen. Atzetik doaz Araba eta Gipuzkoa, %6,29ko eta %5,98ko langabezia tasarekin. Araban eta Gipuzkoan murriztu zen gehien langabezia tasa irailean; %1,83 eta %1,67, zehazki.Aurretik lanik ez zuten langabeen kopuruak soilik egin zuen gora joan den hilabetean. 358 laguneko hazkuntza izan zuen. Gainerako jarduera sektoreetan behera egin zuen lan bila ari zirenen proportzioak. INEMen arabera, 32 langabe gutxiago ziren irailean nekazaritzan. Zerbitzuetan 44 beharginekoa izan zen murrizketa. Industrian eta eraikuntzan izan ziren, ordea, jaitsiera handienak. INEMen arabera, industrian 427 pertsona gutxiago ari ziren irailean lan bila eta 568 gutxiago eraikuntzakoak zirenak.Espainian, ordea, 20.023 langabe gehiago zenbatu zituen INEMek irailean. Langabeen kopurua 1.618.415eraino igo zen, beraz. %8,45eraino langabezia tasa.
Enplegua, «kaskarra»
UGTk iraileko langabeziaren murrizketa «itxurazkoa» eta «gutxienekoa» dela ohartarazi zuen. Salatu zuenaren arabera, Arabako, Bizkaiko eta Gipuzkoako enplegua «oso kalitate kaskarrekoa eta iraupen laburrekoa» da. «Gizarte akordioa ezinbestekoa da behin-behinekotasuna saihesteko», gaineratu zuen.
CCOOk ere enpleguen behin-behinekotasunaren aurka egin zuen. Arabako, Bizkaiko eta Gipuzkoako langabeziaren murrizketa ez dela adierazgarria ohartarazi zuen. Era berean, gizarte elkarrizketari ezinbestekoa iritzi zion. Nafarroako CCOOk, ostera, INEMen datuarekin «pozik» dagoela azpimarratu zuen, «murrizketa joera artean ere indarrean delako».
-
EUROPAKO BATASUNA
Langabezia tasa %9koa izan da abuztuan, uztailean bezala
Europako Batasuneko abuztuko langabezia uztailaren parekoa izan zela jakinarazi du Eurostatek; %9koa. Urtez urteko datuak alderatuz gero, ordea, 0,1 puntu murriztu zen tasa abuztuan eta 0,1 puntu igo Eurogunean. Langabe proportzio handienak Polonian (%18,7),eta Eslovakian (%15,7) zenbatu zituzten Eurostatek. Tasa apalenak, berriz, Irlandakoa (%4,4) eta Luxenburgokoa (%4,3) dira. Alemaniako Enplegu Agentziaren arabera, 89.900 langabe gutxiago ziren herrialdean irailean. %10,5etik %10,3ra jaitsi zen, beraz, langabezia tasa. Agentziak zehaztu zuenez, murrizketa uda sasoiko lanek eraginda gertatu zen.
