Behargin bat hil da gaur goizean Errenteriako (Gipuzkoa) Altzate auzoan, aldamio batetik erorita. Ertzaintzak 11:15ak aldera izan du gertakariaren berri, eta larrialdi zerbitzuek gizona berpizteko ahaleginak egin dituzten arren, ez dute lortu. Proteclan enpresako langilea zen zendutakoa eta Gailur eraikuntza enpresaren obra batean ari zen beharrean.
Sare sozialen bidez, Aizpea Otaegi Errenteriako alkateak (EH Bildu) doluminak helarazi dizkie senideei, lankideei eta lagunei, eta aldarri bat egin du: «Izan dadila azkena!».
Gizona lanean ari zen. Hori kontuan izanda, aurten Euskal Herrian beharrean ari zela hildako zazpigarrena da. Atzo garraiolari bat hil zen Cadreitako (Nafarroa) istripu batean, eta, astelehenean, beste langile bat hil zen istripuz, Nafarroa iparraldean, Arriben (Araitz). Eskailera bat egiten ari zela, zortzi metrotik erori zen.
