Azpeitian (Gipuzkoa) du lantegia Fagor Grupo Mueblek (FGM), eta batez ere hoteletarako altzariak egiten ditu. Sektore horretan jarraitu nahi du jabe berriak, eta gogorarazi du dagoeneko zortzi milioi eurotik gorako eskaerak dituztela "ospe handiko" hotel kateen aldetik, horien artean Hilton, Accor, Holiday Inn eta Melia.
Maecenas Kapital zailtasunetan dauden enpresak erosten eta berregituratzen dituen funts bat da, eta Madrilen du egoitza. Fagor Grupo Muebleren kapitala handituko du eta horri esker FGMk "oraingo merkatuei eutsiko die eta negozio aukera berriak zabalduko dizkio". Bereziki AEBei begira daude.
FGM Mondragon taldeko kooperatiba bat zen eta zailtasun ekonomiko handiak izan ditu azken urteotan, altzari salmenten beherakadaren ondorioz. Langileek beste kooperatiba berri bat sortu dute eta horren bidez FGM berriaren zati bati eutsiko diote. Mondragon Inversionesek ere parte hartuko du proiektu berriaren hasieran.A
Jabe berriak dio oraingo lantaldeari eutsiko diola. Enpresaren izena aldatu nahi du.
