Europako Next Generation funtsetik 537,5 milioi euro jasoko ditu Nafarroak, eta, otsaileko azken datuen arabera, 180,8 milioi euro ordaindu egin dituzte
Otsaileko datuak funtsen inguruko webgune berrian daude jasota. Hain zuzen ere, webgune horren edukia laburbildu dute Jose Luis Arasti Nafarroako Gobernuko Ekonomia eta Ogasun kontseilariak eta Julio Cifrian Ekonomia-Next Generation arloko zuzendariak.
Funtsen kudeaketa administratiboa eta prozedura konplexua denez, azalpen eta argibide ugari daude webgunean. Enpresentzat, norbanakoentzat eta udalentzat pentsatua da. Arastiren arabera, «intuitiboa» da, nabigatzeko erraza, eta, aurrekoarekin alderatuta, «osoagoa». «Borondatea dugu herritarrei funts hauen inguruko informazio azpimarragarri guztia emateko eta aholkularitza eskaintzeko».
Bertan, funtsen inguruko azalpen orokorrez gain eta zalantzak argitzeko erantzunez gain, beste hainbat atal ditu: hala nola deialdiak eta lizitazioak; albisteak; informazio juridikoa edo proiektuen finantzaketa.
Aurki, Next Generation funtsen bilakaerari buruzko argibideak eman beharko ditu Arastik Nafarroako Parlamentuan.
