Petrolioaren merkatuan ezusteko mugimendu bat gertatzen ari da. Brent upelaren prezioak ia %20 egin du behera apirilaren hasieratik, eta azken lau urteetako apalenetakoa da, 60 euro ingurukoa. Hala ere, LPEE + Lurralde Petrolio Esportatzaileen Erakundeak eta haren aliatuek ezohiko erabaki bat hartu dute: ekoizpena handitzea. Baliteke prezioak are gehiago jaistea horren ondorioz.
Ekainaren 1etik aurrera, Saudi Arabia eta Errusia buru dituen taldeak 411.000 upel gehiago produzituko ditu egunero, apirilean hitzartutakoa halako hiru. Neurri horren ardura zortzi herrialdek hartuko dute: Saudi Arabiak, Errusiak, Irakek, Arabiar Emirerri Batuek, Kuwaitek, Kazakhstanek, Aljeriak eta Omanek.
Pandemiaren ondoren, LPEEk politika kontserbadoreago bati eutsi zion, eta pixkanaka ekoizpena igoz upelaren prezioa garestitu ahal izateko. 100 dolarrera iristea zen hasierako asmoa, baina helburu horretatik oso urrun geratu da. Orain, errotik aldatu du estrategia.
LPEEk argudiatu duenez, petrolioaren eskaria laster handituko da, eta horrek justifikatzen du eskaintza handitzea. Baina, analisten ustez, horrek ez du guztia azaltzen. Haien ustez, Saudi Arabiak mezu argi bat bidali nahi izan die merkatuei: erakutsi nahi du lehiakideek baino gaitasun handiagoa duela prezioen gerrari eusteko. Izan ere, Saudi Arabiaren produkzio kostuak txikiagoak dira AEBetakoa baino, besteak beste, Saudi Arabiak frackinga erabiltzen baitu petrolioa lur azpitik ateratzeko.
Albisteak jada eragina izan du petrolioaren etorkizuneko prezioetan. Goldman Sachsek dio Brent upelaren prezioa 2 eta 3 dolar artean jaits daitekeela aurten eta datorren urtean. Morgan Stanleyk kalkulatu du balitekeela jaitsiera hori 5 dolarrekoa izatea.
Oraindik munduan petrolioaren kontsumoak gorantz egiten badu ere urtero, garraio elektrikoa zabaldu ahala —batik bat, Txinan— eskaria ez da garai batean bezala igotzen. Horrek asko zailtzen die ekoizleei aurrez jakitea merkatuak zer bilakaera izango duen. IEA Nazioarteko Energia Agentziak uste du aurten milioi bat upel izango direla sobran. LPEE+ taldea, baina, ez dator bat kalkulu horrekin, eta IEAri leporatu dio herrialderik industrializatuen interesei men egitea.
