Mariano Rajoyk teknikari bat eta ez politikari bat aukeratu du Ekonomia Ministerioa gidatzeko. Ramon Escolano (Zaragoza, Espainia, 1965) ekonomista da lanbidez, eta azken urteetan Europako Inbertsio Bankuko lehendakariordea izan da. Aurretik ICO Kreditu Ofizialeko Institutuko burua izan zen (2012-2014).
Orain arteko ministroak, Luis de Guindosek, EBZko lehendakariorde kargua hartuko du ekainaren 1ean, Vítor Constancio portugesaren ordez. Urtean 334.080 euroko soldata gordina izango du Guindosek Frankfurten, ministro gisa jaso duenaren halako bost.
Guindos EBZn jartzea erabaki politiko hutsa izan da, Espainiak EBko goi karguetan dagokion "kuota" betetzeko modu bat. Europako Parlamentuak ez zuen espainiarra banku zentralean nahi, kargu horretarako politikoegia zela argudiatuta. Nahiago zuen beste hautagaia, Phillippe Lane Irlandako banku zentraleko burua, baina Dublinek haren hautagaitza kendu zuen, EBko kideen artean nahiko babesik ez zuela ikusi zuenean.
EBZn postua sartu aurretik, Guindos saiatu zen Eurotaldeko presidentetza lortzen, baina huts egin zuen.
EBZko presidenteak, Mario Draghi italiarrak, 2019. urtearen amaieran utziko du kargua. Jens Wiedman Bundesbankeko presidentea da hura ordezkatzeko faboritoa. Edonola ere, aurkari asko ditu Weidman belatzak, orain arteko diru politikarekin oso kritiko azaldu delako, noiz eta EBZren jokabideak babes handia izan duenean.
