ekoNOMIA

Sanzek uste du PSNk berriro babestuko dituela Nafarroako aurrekontuak

Alderdi sozialistaren eta UPNren "aldeak gainditzeko moduak" direla dio lehendakariak. PSNk aurreko urteetan ere gobernuaren aurrekontuen alde egin izan du, oposizioan egon arren. "Erantzukizuna duela erakutsi du PSNk", Sanzen arabera.

2010eko azaroaren 22a
13:56
Entzun
"Baikor" agertu da gaur Miguel Sanz (UPN) Nafarroako Gobernuko lehendakaria herrialdeko 2011ko aurrekontuei buruz, uste baitu PSNk berriro babestuko dituela. Alderdi sozialistak aurkeztutako emendakinak aztertu ondoren egin du balorazio hori. "Jakina, baditugu aldeak, bi alderdi gara, eta alde batzuk garrantzitsuak dira, baina horiek gainditzeko modukoak dira. Garai zail hauetan erantzukizuna duela erakutsi du PSNk".

Oposizioan egon arren, PSNk aurreko urteetan ere babestu izan ditu UPNk aurkeztutako aurrekontuak. "Ez gara ari, ordea, antzezpena egiten", adierazi du Sanz lehendakariak.

Haren arabera, arlo fiskalean, inbertsio batzuen lehentasunean, enplegu politikako zenbait kontutan eta kulturan dauzkate ikuspegi desberdinak Gobernuak eta PSNk. "Akordioa lortzea da nire egitekoa".

CDNrekin eta Nafarroa Bairekin akordioa lortzea "ezinezkoa" dela deritzo Sanzek, haiek "demagogia" erabiltzen dutelako. "CDNk, adibidez, esaten du funtzionarioen soldatei eusteko ez eraikitzeko Erresuma Batua pabilioia edo Sanferminetako Museoa. NaBaik, berriz, 300 milioi euroko kostua duten emendakinak sartu ditu".
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.