Guillaume Pepy SNCFko presidente-zuzendari nagusiak Radio Classiquen egin dioten elkarrizketan azaldu du bere konpainiak "jokatu" egingo duela "erosteko ahalmenaren aldeko mobilizazio nazionalaren jokoa". Pepyren arabera, "abenduko nominarekin" aurten soldata igoerarik izan ez duten cheminot-ek aparteko ordain berezi bat jasoko dute.
Lehen ordain batean 400 euroko lansaria jasoko dute gutxieneko soldata halako 1,5etik behera jasotzen duten SNCFko beharginek eta 200 euroko saria gutxieneko soldata halako 1,5 eta biren artean irabazten dutenek. SNCFk ehun mila langile inguru ditu eta ordain horrek 30 milioi euroko kostua izango du "urtea irabaziekin itxiko duen enpresarentzat". Pepyk azaldu du 2019an ez dela izango igoerarik bidaia txartelen prezioan.
Urte bukaeran langileei aparteko sari bat emateko eskaria joan den abenduaren 10ean egin zuen Emmanuel Macron Frantziako Errepublikako presidenteak, Jaka Horien sumina baretu nahian iragarritako neurriekin batera. SNCFz gain, aurretik ere izan dira gutxien irabazten duten beharginentzatk halako sariak iragarri dituzten enpresak, batez ere tamaina handikoak: Orange, Publicis, Alitce, Iliad, LVMH, Kering, Total...
Defizita %3,2ra
Jaka Horiak baretzeko neurriek 2019an 10.000 milioi euroko kostua izango dutela azaldu du Edouard Phillipek Les Echos egunkarian eta horrek igoarazi egingo duela defizit publikoa, lehen aurreikusitako %2,8tik %3,2ra. Horrek esan nahi du Frantziak ez duela Europako Batasunetik agindutakoa —defizita %3tik azpira izatea—beteko, beste behin.
