Sute bat piztu da Smurfit Kappa Nervion enpresak Iurreta eta Durango artean duen paper fabrikan (Bizkaia). Bizkaiko suhiltzaileek jakinarazi dutenez, 17:30 aldera gertatu da ezbeharra, lantegiaren kanpoaldean pilatuta zeuden hainbat paper bobinak su hartu dutenean. Zenbait kilometrotatik ikus daitekeen ke zutabe trinkoa sortu du suteak, baina ez du zauriturik eragin.
Ertzaintzak N-634 errepidea itxi du bi noranzkoetan, garrak errepidetik gertu zeudelako. Bizkaiko Foru Aldundiaren esanetan, sutea gehiago hedatzeko arriskurik ez dago jada, baina kostako da erabat itzaltzea.
