Vital Kutxak 32 milioi euro irabazi ditu lehen seihilekoan

Vital Arabako aurrezki kutxak ere irabaziak izan ditu aurtengo urtearen lehen sei hilabeteetan, gaur berak emandako datuen arabera. 32,3 milioi euro irabazi ditu garbi, iaz garai berean baino %3,2 gehiago.

8.870 milioi euroko balantzea izan du ekainaren bukaeran -2008koa baino %6 handiagoa da kopurua-, eta arlo denetan hazkunde "orekatua" izan duela adierazi du.

Kostuak "kontrolatu" ditu Vital Kutxak, eta horrek gastu orokorrak %0,85 jaistea ekarri du. Maileguak-eta ordaintzen ez dituzten lagunen kopurua ere kontrolatu duela dio.

Krisi ekonomikoa dela-eta enpresen jarduera sustatzeko asmoz Eusko Jaurlaritzarekin "lankidetza estuan" aritu da Arabako aurrezki kutxa, honen arabera.