Zer da borondatezko berregituraketa?

Greziaren zorraren hartzekodun pribatuek nahi badute hartuko dutela parte herrialdearen finantza egoera hobetzeko proposamenetan —Alemaniak behartu egin nahi zituen—. Ez dute zehaztu nola egingo duten, baina formula ezberdinak egon daitezke: interes tasak jaistea, interes tasen ordainketa atzeratzea, zor berriak zaharra mendean hartzea edota maileguen printzipala murriztea izan daitezke formuletako batzuk. Zorraren epeak atzeratzea da beste aukeretako bat, truke baten bidez edo zorra ordaindu bezain pronto berriz finantzatzeko konpromisoaren bidez.

Borondatezkoa bada, bankuek parte hartuko dute?

Alternatiba okerragoa dela iruditzen bazaie, bai. Hartzekodun pribatuei ez zaie komeni Grezia zorra ordaindu ezinda geratzerik, Lehman Brothersen porrotak edukitako efektua edukiko lukeelako. Hartzekodun handiek presio politikoa izango dute; txikiek eta espekulatzaileek ez dute parte hartuko, ziurrenik.

Neurriak konponduko al du zerbait?

Denbora irabazteko aukera emango dio Greziari. Gainerako herrialdeetan ere berehalako eragin positiboa izan du, batez ere Portugalen eta Irlandan, porrotaren mamua uxatu egin delako.

Zein dira Greziaren hartzekodunak?

Basileako Nazioarteko Ordainketen Bankuaren arabera, Alemaniako, Frantziako eta AEBetako bankuak dira hartzekodun nagusiak.