Aurrekontuak onartzeko bilkura izan zuten ostegunean Artziniegako Udalean (Araba), eta euskarazko eskualdeko komunikabidea laguntzarik gabe uztea erabaki zuten: Aiaraldea-rekin sinatutako ituna bertan behera utziko du udalak, eta publizitaterik ere ez du jarriko.
Komunikabideak berak azaldu duenez, 1.500 euroko diru laguntza jaso du azken zazpi urteetan udal horretatik. Izatez, eskualdeko udalerri guztiek adostu zuten euskarazko hedabidea laguntzeko ituna.
Euskara sustatzeko diru laguntzek behera egingo dute, orobat. Aiaraldea-k berak emandako datuen arabera, euskara sustatzeko proiektuetara 4.500 euro bideratuko ditu udalak, eta euskara ikasleen artean 2.300 euro banatuko ditu.
