Umeentzako abestiak prestatu ohi ditu Ene Kantak egitasmoak, eta proiektu berri batean ari dira lanean; Astonauta izena du, eta hamasei abesti ditu, hamasei bideorekin: "Espaziora bidaiatu ahal izanen duzu, eta txikienak dantzan etengabe ariko dira".
Disko guztien irabazien zati bat euskararen alde edota euskararekin lan egiten duen talderen batentzat izan ohi da. Oraingoan, BERRIA egunkariarentzat izango da. 20.000 euro bildu nahi dituzte, eta Interneten diru hori biltzeko kanpaina bati ekin diote.
Hainbat lagun ezagunek parte hartu ohi dute ekimenean, eta hala izan da oraingoan ere. Besteak beste, Natxo De Felipe Oskorriko musikariak, Alex Sardui Gatibu taldeko abeslariak, Mikel Markez kantariak, Sara Cozar aktoreak, Amets Arzallus bertsolariak eta Jone Guarrotxena, Mikel San Jose, Oier Sanjurjo, Markel Bergara eta Imanol Agirretxe futbolariek hartu dute parte.
Gainera, hamabost herri eta euren inguruetako ikasleek abestiak dantzatu dituzte; tartean, Antsoain, Barakaldo, Burlata, Doneztebe, Gares, Gasteiz, Irun, Iruñe, Irura eta Lasarte-Oriako umeek hartu dute parte.
