2011 aurreko osasun arretara itzultzea nahi dute Tolosaldeko alkateek

Osasun arreta 2011ko hitzarmenaren aurreko egoerara itzultzea. Horixe eskatu dute Tolosaldeko eta inguruko herrietako udalek. «Lehen bezala, espezialistek Tolosako osasun etxean kasu egitea nahi dugu, eta erreferentziazko ospitaleak Asuncion eta Donostiako Ospitalea izatea», azaldu du Ibai Iriartek, Tolosako alkateak.

Tolosaldeko zein inguruko hainbat herritako alkateak Eusko Jaurlaritzako Osasun sailburu Jon Darponekin bildu ziren herenegun, orain eskualde horretan ematen den osasun zerbitzua aztertzeko. Duela bi urte hitzarmena sinatu zuen Osasun Sailak Asuncion klinikarekin. Horren arabera, espezialistek emandako zerbitzu gehienak itunpeko erietxe horren esku geratu ziren, eta beste gehienak Donostiako Ospitalera bideratu zituzten. Ia ez dago espezialistarik dagoeneko Tolosako osasun etxean. Horrek osasun arreta okertuko duela salatu izan dute ordutik eskualdeko alkate eta herritarrek. Manifestazioak ere egin dituzte.

Egoeragatik kezka azaldu zioten bileran Darponi, eta eskatu zioten hitzarmenaren balorazio eta jarraipen bat egiteko. «Osasun Saileko arduradunek esan ziguten egun eskaintzen den arreta ona dela, baina prest daudela hitzarmenaren aurretik zegoen egoerara itzultzeko aukera aztertzeko; baita mahai bat osatzeko ere hitzarmenaren jarraipena eta azterketa egiteko», jakinarazi du Iriartek.

Hori kontuan hartuta, alkateak gustura irten ziren bileratik. «Balorazio ona egiten dugu, zerbitzuak hobetzeko mekanismoak topatzeko borondatea azaldu baitute».

Dena den, legealdi honetan Osasun Sailak Tolosalderako dituen egitasmoez ere hitz egin zuten, eta Darponek baieztatu zien ez dutela beste azpiegiturarik eraikiko, ezta ospitale publikorik egiteko ere. Datozen lau urteetarako dituen asmoen berri emateko agerraldian, Darponek berak esan zuen «herritarren agintaldia» izango dela. Jaurlaritzaren asmoa da abian dituzten obrekin baino ez jarraitzea.