Auto istripu lazgarria izan da gaur 07:20 aldera N-124 errepidean, Berantevilla parean (Araba). Eusko Jaurlaritzako Segurtasun Sailak jakinarazi duenez, 22 urteko bi lagun hil dira, bata Cintruenigokoa (Nafarroa) eta bestea Logroñokoa (Espainia). Beste pertsona bat larri eraman dute Txagorritxuko ospitalera.
Bi ibilgailuk elkar jo dute. Istripuan hildako biak ibilgailu horietako batean zihoazen, eta zauritutakoa, bestean. Istripuaren ondorioz errepidea itxi behar izan dute pare bat orduz, baina 10:45 aldera zabaldu dute berriro.
Hildakoen gorpuak auzitegi medikuntzako institutura eraman dituzte, autopsia egiteko, eta Polizia ikertzen ari da istripua nola gertatu den.
