Lau hilabeteko lanen ondoren, A-15 autobideko San Lorenzo-Larre tuneleko lanak amaituko ditu Gipuzkoako Foru Aldundiak, asteburu honetan. Berritze lan horietarako, erabat itxiko dute Leitzarango autobidea, Gipuzkoa eta Nafarroa artean.
Donostiako noranzkoan, Berastegiko (Gipuzkoa) lotunetik aurrera egingo da mozketa, eta, Iruñeko noranzkoan, berriz, Andoaingo lotunetik (Gipuzkoa) aurrera. Trafiko etena larunbatean hasiko da, 08:00etan; asteleheneko ordu berera arte iraungo du.
Aldundiak azaldu duenez, A-15 autobidea Donostiako noranzkoan erabili nahi dutenek, GI-2130 errepidea hartu beharko dute Berastegin, Tolosara (Gipuzkoa) heldu eta han N-I errepidea hartu arte. Alderantzizko bidea egin beharko dute Andoaindik Iruñeko noranzkoan joan nahi dutenek.
