Istripu larria izan da gaur goizean AP-1 autobidean, Soraluze (Gipuzkoa) parean: adin txikiko bat hil da, eta beste lau lagun zauritu dira, guztiak familia bereko kideak. Eusko Jaurlaritzako Segurtasun Sailaren arabera, ezbeharra 6:15ak aldera gertatu da, Eibarrerako noranzkoan, Eitza tunelaren barruan.
Abisua jaso bezain pronto bertaratu dira larrialdi zerbitzuak, suhiltzaileak, anbulantziak eta ertzainak, eta zaurituta topatu dituzte ibilgailuan zihoazen bost lagunak. Mediku batek baieztatu du adingabearen heriotza, eta gainontzeko laurak Donostia ospitalera eraman dituzte.
Autoak Frantziako matrikula zuen, eta Ertzaintza ikertzen ari da istripua zerk eragin duen. Ezbeharraren ondorioz, AP-1 autobidea itxita dago noranzko horretan, eta trafikoa GI-627 errepidetik bideratzen ari dira, Bergara (Gipuzkoa) hegoaldeko irteeratik.
