Aritz Labiano eta Haritz Gartxotenea preso zarauztarrak aske utziko dituzte bihar, Zarauzko Herrira-k jakinarazi duenez. Zarauzko (Gipuzkoa) Musika plazan harrera egingo diete bihar iluntzean.
Urtebete eman dute espetxean Labianok eta Gartxoteneak; iazko apirilaren 27an atxilotu zituzten. Egun horretan euren burua Auzitegi Nazionalean aurkeztu behar zuten, espetxeratu zitzaten. Egunsentian, ordea, Zarauzko Santa Barbaran zintzilikatu ziren, Utzi pakian leloa zuen pankartarekin. Ertzaintzak arratsaldean atxilotu zituen. Bideo bat zintzilikatu zuten sarean, auzitegira ez aurkezteko arrazoiak azaltzeko.
Anonimo baten salaketa batean oinarrituz, epaileak urtebeteko zigorra jarri zien ustez manifestazio batean Gora ETA! oihukatu zutelako.
