Artola «desobedientziagatik» epaitu dezaketela uste du Garrido epaileak

Jone Artola txupinera «desobedientziagatik» epaitu dezaketela adierazi du Luis Garridok, EAEko Auzitegi Nagusiko Administrazioarekiko Auzi Epaitegiko presidenteak. Garridok azaldu du debekua berresten bada neurri judizialak martxan jarri ahal izango direla, Jone Artola Aste Nagusiko hainbat ekitalditan egon delako txupineraz jantzita, «autoak hori debekatzen zuen arren». Arriagan bota zen txupinazoan Artola balkoira igo zen, baina kasu horretan ez zen deliturik egon, Garridoren arabera, Artola uniformerik gabe zihoalako eta konpartsen ordezkari moduan bertan egotekoeskubidea zuelako. Horretarako, baina, debekua berretsi beharko litzateke, konpartsek errekurtsoa jarri zutelako, eta Garridok ez du uste hori berehalakoan gertatuko denik. Urte bukaerara arte itxaron beharko delakoan dago, «gutxienez».