Frantziako Poliziak hiru ustezko etakide atxilotu ditu gaur arratsaldean, Pauen: Asier Borrero, Itziar Plaza Fernandez eta Iurgi Garitagoitia Salegi. Atxiloketaren unean armak zituzten, Poliziaren arabera, material informatikoa ere bazuten, eta Macieres auzoan atzeman dituzte, saltoki handi batetik irtetean.
Espainiako Poliziarekin elkarlanan egin du operazioa, ikerketa iturriek Efe berri agentziari esan diotenez. Poliziak dio etakide bilatuenen artean zituztela hirurak.
ETAren Bizkaia komandako kide ohitzat jo dute Borrero (Getxo, Bizkaia; 24 urte) eta, besteak beste, Calahorran (Espainia) Guardia Zibilaren kuartelaren aurka bonba-autoa lehertarazi izana, Zarauzko (Gipuzkoa) ertzain etxearen aurka bonba jarri izana eta Bizkaian Balmasedan eta Derion PSE-EEren egoitzen aurka lehergailuz atentatuak egin izana leporatzen diote. Duela gutxi Montpellierren (Frantzia) tiroz Frantziako polizia bat zauritu zuten ekintzarekin ere lotu dute.
Plaza (Bilbo, 26 urte) ere, polizia iturrien arabera, Bizkaia komandako kide izan zen.
Garitagoitiari (25 urte), berriz, Isaias Carrasco PSE-EEko zinegotzi ohiaren eta Inazio Uria enpresaburuaren hilketak egin zituen komandoko kide izatea egozten diote. Carrasco 2008ko martxoan hil zuen ETAk, Arrasaten (Gipuzkoa), eta Uria 2008ko abenduan, Azpeitian (Gipuzkoa).
Atxiloketak
Asier Borrero, Itziar Plaza eta Iurgi Garitagoitia ustezko etakideak atxilotu dituzte Frantzian
Pauen egin du operazioa Frantziako Poliziak, Espainiakoarekin elkarlanean. Atxiloketaren unean armak eta material informatikoa zeuzkaten, ikerketako iturrien arabera.
Iruzkinak
Ez dago iruzkinik
Ordenatu
