Aspaldiko partez hartuko dute lekukoa

Korrikaren ibilbidea zehazterakoan bi irizpide nagusi izaten dira: batetik, AEK-k euskaltegia duen herrietatik pasatu behar du Korrikak, eta, bestetik, ahalegina egin behar da hiriburuetatik asteburuan pasa dadin. Irizpide horiekin, euskaltegirik ez duten herri txiki asko gelditzen dira Korrikaren ibilbidetik at. Herri horietatik AEKri eskaera ugari egiten dizkiote, Korrikaren hurrengo ekitaldia handik igaro dadin.

Aurten bi dira euskararen aldeko lasterketak aspaldian pasatzen ez zituen eta aurten igaroko dituen herriak: Dima eta Bastida. Bastidatik (Araba) hurrengo asteartean igaroko da, apirilaren 9an, 19:15ean; Dimatik (Bizkaia), berriz, apirilaren 13an, larunbatez, 22:20an.

Gorka Elgoibar da Bastidan Korrika antolatzen ari den taldeko kideetako bat. Gasteiztarra da, baina Bastidako Ikastolako irakaslea da, eta handik sustatu dute Korrika Batzordearen sorrera. Eguberri aurretik egin zuten Korrika antolatzeko lehen bilera Bastidan. «Arabako Errioxanirrikan egoten dira Korrika igarotzeko, eta Bastidatik ez zen aspaldi igarotzen. Hemendik pasatu zen azkena 16. Korrika izan zen, 2009an».

Lanerako gogoz

Euskararen aldeko edozein jarduera Arabako Errioxan ongi etorria izaten dela argitu du, halaber, Elgoibarrek. Eta hori nabarmena izan dela Korrika antolatzeko garaian ere. «Jendea gogo biziz zegoen, eta hori igarri da lanerako, kilometroak erosteko, herria apaintzeko, Korrika Kulturala antolatu eta parte hartzeko... Urte oso berezia izaten ari da guretzat». Bastida inguruko 14 kilometro kudeatu dituzte Korrika Batzordekoek, eta kilometroak erraz saldu direla argitu du Elgoibarrek. «Arabako Errioxan beti izaten da halako kezka bat, eta guk ere bagenuen, baina oso ondo joan da dena. Bestalde, egia da oso ordutegi ona tokatu zaigula ere, arratsaldean pasatuko baita herritik».

Korrika Kulturalean hainbat jarduera egin dituzte azken hilabetean —haurrentzako jolasak, dantza plaza, ginkana, ardo dastatzea, pilota txapelketa...—, eta jarduera arrakastatsuak izan dira oro har. Bai Korrikak eta bai Korrika Kulturaleko ekintzek Arabako Errioxan euskarak presentzia handiagoa izan dezan berebiziko bultzada ematen dutela dio Elgoibarrek: «Korrikak beti laguntzen du horretan, Korrikaren magiak indar handia du».

Euskaraldiak eta Korrikak epe nahiko laburrean bat egin izanak, gainera, bultzada horren indarra biderkatu duela uste du. «Jendea dinamizatzea, taldeak sortzea, bilerak-eta euskaraz egitea... alegia, euskaraz aritzeko aitzakia berriak topatzea errazten dute gisa horretako dinamikek, eta euskararen aldeko edozein pauso garrantzitsua da Bastida bezalako herri batean».

Alde horretatik, Elgoibarrek nabarmendu du gero eta bastidar gehiagok dakitela euskaraz. «Euskaldun gero eta gehiago gara, baina ezagutzatik erabilerarako jauzi hori falta da». Irakaslea izanik, batez ere umeen artekoari erreparatzen dio Elgoibarrek, eta umeek euren artean batik bat gaztelerazegiten dutela dio. «Beraz, Korrika bezalako momentuak bizi izan dituztenean, non gurasoak euskaraz hitz egiten, euskararen inguruan mugitzen eta gauza zoragarri bat egiten ikusten dituzten... beraientzako oso inportantea da, eta euskaraz egitera bultzatzen ditu».