'Ateak zabalik' ekitaldia egingo da bihar Martin Ugalde Kultur Parkean

Ateak zabalik izeneko ekitaldia egingo du bihar arratsaldeko 18:00etatik aurrera Euskararen Gizarte Erakundeen Kontseiluak Martin Ugalde Kultur Parkean. Ekimenaren helburua bertako enpresa eta erakundeek nola lan egiten duten erakustea da.

Xabier Mendiguren Kontseiluko zuzendariak atzo eguerdian Donostiako Bulebarrean egin zen elkarretaratzean azaldu zuenez, parkeko enpresetanbeste edozein elkartetan bezala lan egiten dela erakustea da helburu nagusia. «Beste edozein lantokitan bezala lan egiteagatik atxilotu eta epaitu egiten dituzte. Kontraesan hori jarri nahi izan dugu agerian, gizarteak bere ondorioak atera ditzan. Bertan aritzen direnen eguneroko lana da gizarteari erakutsi nahi dioguna eta horregatik antolatu nahi izan dugu horrelako ekintza bat», esan zuen Mendigurenek.

Kontseiluak Euskal Herriko politikari eta artista ezagunei gonbidapen bereziak bidali dizkien arren, nahi duen guztiak izango du Martin Ugalde Kultur Parkea gertutik ezagutzeko aukera. Horretarako, aurkezpenaren ostean, bertara inguratzen direnek parkeko enpresak bisitatu eta bertakoek nola lan egiten duten ikusteko aukera izango dute.

Kontseiluak, bestalde, gonbidapen bereziak bidali dizkie Euskal Herriko alderdi politiko guztiei. Horiez gain, baina, kultura eta hezkuntza munduko ordezkariak ere gonbidatu ditu erakundeak biharko Ateak Zabalik ekimenera.

Hasierako ekitaldietan abeslari eta idazle ezagunek hartuko dute parte eta amaierako hitzaldia, berriz, Xabier Mendiguren Kontseiluko zuzendariak berak emango du.

Ugari dira Martin Ugalde Kultur Parkean egoitza duten enpresa eta elkarteak: Abarka, Egunkaria, Leitzaran Grafikak, Kontseilua, Berria, Aztiker, Euskarazko Komunikazio Taldea, Bilgune Feminista eta Euskal Editorea dira horietako batzuk.

Ekimenaren zergatia

Iñaki Lasa Kontseiluko ekintza politiko instituzionalaren arduradunak azaldu zuen joan den ostegunean biharko ekimenaren zergatia: «Gure lana zalantzan jarri nahi izan dute. Horregatik eragile sozial eta politikoei eta erakundeetako ordezkariei hona etortzeko gonbidapena egin nahi diegu».

Joan den ostegunean Guardia Zibila parkean sartu eta euskalgintzako zortzi ordezkari atxilotu zituenetik hainbat ekitaldi antolatu ditu Kontseiluak. Biharkoaren helburua, orain artekoena bezala, gertatutakoa salatu eta egon daitezkeen susmoak funtsik gabekoak direla frogatzea litzateke.

Kontseiluak deialdi irekia egin nahi izan dio gizarte osoari ekimen honen bitartez, nahi duen guztiak parkearen funtzionamendua bertatik ezagutzeko aukera izan dezan. Antolatzaileen arabera, ahalik eta jende gehien erakartzea litzateke onena. Horregatik, deialdi zabala egitea erabaki dute.