Nafarroako Justizia Auzitegi Nagusiak ez du onartu Nafarroako Unibertsitateak 2016-2017ko beken deialdiari jarritako helegitea.
Administrazioko Auzietarako Salak ondorioztatu du Opus Deiren unibertsitateak "ez duela inongo eskubiderik" diru laguntzak eskatzeko edota deialdiak inpugnatzeko, "ezta ikasleak ordezkatzeko eskumenik ere". Izan ere, epaileen arabera, bekak eskatzeko eskubidea ikasle batzuei dagokie soil-soilik: "Bekak jasotzeko eskubideak izaera pertsonala du; gainera, eskatzaileak bete beharreko baldintza batzuen eta bere familiaren errenta mailaren araberakoa da, ez da ematen unibertsitateko ikasle izate hutsagatik".
UPNren agintaldian, Opus Deiren unibertsitateko ikasleek jasotzen zuten beken diruaren %61, Nafarroako unibertsitateko ikasle guztien %18 soilik izanda. Desoreka hori konpontze aldera (eta unibertsitate publikoko ikasleak lehenesteko), irizpideak aldatu zituen Nafarroako Hezkuntza Departamentuak.
Deialdian beste irizpide batzuk sartu zituzten. Nagusia: Opusen unibertsitatean laguntza eskuratzeko, aurrez NUP Nafarroako Unibertsitate Publikoan izena eman behar izatea, eta azaldu behar izatea zergatik jo duten pribatura. Bi justifikazio bide aipatu zituzten: NUPen ez dituztela hartu —ez dutelako notarik— edo nahi duten karrera ez daukala NUPek.
Irizpide aldaketa horrek matrikulazioetan galera ekarriko diela argudiatu zuen Nafarroako Unibertsitate pribatuak, baina argudio hori ere atzera bota du Auzitegi Nagusiak: "Helegitea jarri duenak ez du halakorik akreditatu, beka deialdiaren eragin zuzena izanen dela ondorioztatu du soilik; hortaz, ezin zaio legitimaziorik aitortu". Are gehiago: magistratuek gogorarazi diote Opus Deiren unibertsitateari "helegitea jartzen duenaren betebeharra dela inpugnatutako ekintzak era efektiboan eragiten diola frogatzea, era efektibo eta akreditatuan, eta ez soilik hipotesi gisa".
