Bere jaioterrian, Azkoitian (Gipuzkoa), egin diote azken agurra Xabier Arzalluz EAJko buruzagi historikoari. Leporaino bete da Andre Mari Jasokundearen parrokia. Han izan dira bere gertukoenak: senideak eta lagunak. Baita ordezkaritza politiko zabal bat ere. Besteak beste, EAJren zuzendaritzakoak, Andoni Ortuzar presidentea buru zutela, eta Iñigo Urkullu Eusko Jaurlaritzako lehendakariarekin. Haiekin batera, talde berean, iritsi dira Generalitateko Miquel Buch Barne kontseilaria eta Eduard Pujol Junts per Catalunyako diputatua.
Han izan dira, halaber, Uxue Barkos Nafarroako lehendakaria, Markel Olano eta Unai Rementeria Gipuzkoa eta Bizkaiko ahaldun nagusiak, Donostia, Bilbo eta Gasteizko alkateak, eta EH Bilduko Arnaldo Otegi, EAko Pello Urizar, PSE-EEko Idoia Mendia, Ahal Dugu-ko Roberto Uriarte, ERCko Gabrile Rufian eta PDeCATeko Marta Pascal, besteak beste.
Elizan sartu aurretik egin diote omenaldi xume bat, atarian. Hilkutxa lepoan hartuta sartu dute elizan. Gazte batzuek ikurrinak eskuetan zituztela korridore bat osatu dute; "Gora euskadi askatuta" oihukatu du gizon batek; eta "gora" ozen batekin erantzun diote han bildutakoek, txalo artean. Hilkutxa elizatik ateratzean, Eusko gudariak ereserkia abestu dute han bildutako batzuek.
Goizean era egin dute ekitaldia. Eusko Jaurlaritzako ordezkariak Begoñako beilatokian izan dira. "Adimen argiko" pertsona gisa goratu du Iñigo Urkullu Eusko Jaurlaritzako lehendakariak Xabier Arzalluz, eta "Euskal Herriaren kausarekin izandako konpromisoa" nabarmendu du. Lehendakaria buru zela, gobernuko sailburu jeltzale guztiak izan dira goizean Begoñako basilikan, Bilbon, EBBko presidente izandakoaren hil kaperan.
Urkulluk aitortza egin dio "pertsonari eta politikariari", haren hitzetan, "urte luzez EAJko buru izateaz gain, [Espainiako] Kongresuko diputatu gisa, Euskadiren instituzionalizazio prozesuaren sustatzaile" izan zelako Arzalluz.
EAJk, aldiz, ezohiko Aberri Batzarra baliatu du Arzalluzi azken agurra emateko —Espainiako Gorteetarako bozei buruz aritzeko deitu zuten—. Batzarreko presidente Iñigo Zabalza, Eusko Legebiltzarreko presidente Bakartxo Tejeria, EAJren EBBko buru Andoni Ortuzar eta Iñigo Urkullu Eusko Jaurlaritzako lehendakariak adierazpen bat irakurri dute. Alderdiarentzat "une mingarria" dela azaldu dute, "EAJren historian errepikatu ezin den gizasemea galdu" dutelako: "Gaur egun EAJren ordezkari garenok aunitz ikasi genuen Xabier Arzalluzengandik".
Adierazi dutenez, "beti denon ongiaren alde" egin zuen Arzalluzek, "hemen bizi, lan egin eta beren etorkizuna eraiki nahi duten guztien interesen mesedetan. Erakunde hau den bezalakoa bada, neurri handi batean, hari esker izan da". Minutu bateko isilunea ere egin dute.
Aberri Batzarrak Xabier Arzalluz "EAJ-PNVren historian errepikatu ezin den gizasemearen" heriotza tamaldu du. Alderdi jeltzalearen organo gorenak lider abertzaleari gorazarre egiteko adierazpena onetsi du eta minutu bateko isilunea gorde du gaur egin duen ezohiko bileran. pic.twitter.com/6UB87iE82e
— EAJ-PNV (@eajpnv) 2019(e)ko martxoaren 2(a)
Iluntzean izango da, dena den, gaurko hitzordu nagusia. Azkoitian (Gipuzkoa) egingo dute Arzalluzen aldeko hileta, 19:00etan. Ordezkaritza zabala espero da han ere. Atzo, aurkari politikoek ere bisitatu zuten EBBko buru ohiaren hil kapera.
