Babes zabal eta beroa euskararen gotorlekutik

Euskara eta euskal kulturarentzat esanahi handia duen lekua aukeratu zuten Egunkaria auziko auzipetuek zazpi urte hauetan jaso izan duten babes guztia irudikatzeko. Kirol, kultur, politika eta gizarte eragileen ordezkariak elkartu ziren Arantzazun (Oñati, Gipuzkoa) atzo, auzipetuei babesa eta elkartasuna adierazteko, baita aho batez auziaren artxibatzeko eskatzeko ere, Arantzazuko euskararen gotorlekutik.

Hitza hartuta, Joan Mari Torrealdai euskaltzain osoak eta auzipetuak gogoratu zuen Erdi Arotik hona Arantzazu Euskal Herri osoaren bilgune eta sinbolo izan dela. Bertan agertu omen zenetik XV. mendean Arantzazuko Ama Birjina Euskal Herri osoaren ama gisa ikusi zela azpimarratu zuen, garaiko kronista baten hitzetan oinarrituz. Gisa berean nabarmendu zuen Karlistaldietan txikituta gelditu arren, Euskal Herriaren bizi nahiak zutik jarraitu zuela. Euskal artearen munduan daukan garrantziak ere erreferentzia bihurtzen duela ez dauka dudarik. Horren eredu eman zituen santutegia eraikitzen parte hartu zuten ospe handiko hainbat artistaren izenak: Jorge Oteiza, Eduardo Txillida eta Nestor Basterretxea, besteak beste. Euskarari dagokionez, aipamen berezia egin zuen, azpimarratuz 36ko gerraren ondotik, euskarak Arantzazun aurkitu zuela lehenengo babesa euskaltzaleen eta Euskaltzaindiaren aurreneko bilerekin.

Ez dauka zalantzarik Euskal Herriaren, euskal kulturaren, euskalgintzaren eta euskal senaren historian garrantzi handiko lekua izan dela Arantzazu, babesleku bat, gotorleku bat. Baina gotorlekuek zaindariak behar dituzte, eta atzoko ekitaldian asko ziren auzipetuei babesa erakutsi zieten euskal gizartearen ordezkariak. Ordezkaritza zabala bildu zen auzipetuen inguruan, kolore anitzez osatua eta lurralde guztiak ordezkatzen zituena. Bertan egon ziren, besteak beste, Markel Olano, Jose Luis Bilbao eta Xabier Agirre Gipuzkoako, Bizkaiko eta Arabako ahaldun nagusiak, Carlos Garaikoetxea eta Jose Antonio Ardanza Eusko Jaurlaritzako lehendakari ohiak. Juan Jose Ibarretxe ezin izan zen bertaratu, baina bere atxikimendua helarazi zuen. EAJ, ezker abertzalea, Aralar, EA, Ezker Batua, Hamaikabat, Alternatiba eta AB alderdietako buruzagi nagusiek, eta ELA, LAB, EILAS eta CCOO sindikatuetakoek ere ekitaldian parte hartu zuten, beste hainbat gizarte eragileren ordezkarirekin batera. Argi gelditu zen Egunkaria auziko auzipetuek euskal gizartearen gehiengoaren babesa daukatela.

Ez da oraindik bukatu

Auzipetuen izenean Torrealdaik eskerrak eman zizkien, baita zorretan daudela adierazi ere. Baina argi utzi nahi izan zuen ez dela bukatu. «Orain arte bezala behar dugu zuen laguntza, zuen elkartasuna, zuen babesa, zuen arnasa beroa».

Zerrenda

Markel Olano

Xabier Agirre

Jose Luis Bilbao

Carlos Garaikoetxea

Jose Antonio Ardanza

Joseba Egibar

Rufi Etxeberria

Oxel Erostarbe

Ikerne Badiola

Mikel Arana

Eneko Oregi

Ander Rodriguez

Mertxe Colina

Adolfo Muñoz Txiki

Ainhoa Etxaide

Jesus Uzkudun

Loren Arkotxa

Paul Rios

Xabier Mendiguren Bereziartu

Xabier Arzalluz

Koldo Gorostiaga

Bernardo Atxaga

Fermin Muguruza

Laura Mintegi

Baltasar Errazti

Juanmi Arregi

Andres Urrutia

Pedro Miguel Etxenike

Daniel Innerarity

Txaro Arteaga

Ramon Labaien

Iñaki Perurena

Alberto Inurrategi

Gontzal Aizpurua

Nestor Basterretxea

Miguel Madariaga

Nekane Oiarbide

Anjeles Iztueta

Ekitaldiaren bideoa ikusi nahi izanez gero, bisitatu webgune hau: www.berria.info

Bihar jarraituko du epaiketak Auzitegi Nazionalean

Bihar ekingo diote berriro Egunkaria auziko epaiketari Madrilen. Defentsaren lekukoak entzunen dituzte, eta ondotik perituek deklarazioak eginen dituzte. Gehienez, asteazken arte iraunen du epaiketaren fase honek. Otsaila bukaeran, berriz, bi aldeek haien eskaerak helaraziko dizkiote epaimahaiari.

@sarean

Epaiketaren biharko saioa jarraitzeko aukera izanen da Twiterren bidez helbide honetan:

www.berria.info. Aitziber Laskibar BERRIAko kazetariak eginen du saioaren zuzeneko kontakizuna, eta lekukoen zein perituen adierazpenak bilduko ditu saioa aurrera joan ahala.

'Egunkaria'-ren aldeko jaia ospatu dute Madrilen

Madrilgo plataformak antolatuta, Egunkaria-ren aldeko jaia ospatu zuten atzo Madril erdialdeko ikastetxe batean. Madrilgo 28 eragile sozial eta politikok osatzen dute plataforma. Herri bazkarian 100 bat madrildarrek parte hartu zuten. Martxelo Otamendik izan zuen auzipetuak ordezkatzeko ardura. Goizean, mahai-inguru batean parte hartu zuen Mariano Ferrer kazetariarekin, Carmen Lamarca abokatua eta Karlos III.a Unibertsitateko irakaslearekin eta Isaac Rosa idazlearekin batera. Arratsaldea, berriz, jai giroan pasatu zuten musikaz eta euskal kulturaz gozatuz. Madrilen berean 500 bat sinadura bildu dituzte, auzipetuei babesa adierazteko, tartean sona handiko idazle eta sindikalista daude. Ekitaldian ezin zutela parte hartu, eta haien mezuak irakurri zituzten. Gaur bazkari solasaldi batean parte hartuko du Otamendik Carabanchel auzoan. 50 madrildar daude izena emanda. Bestalde, gaur 12:00etan Egunkaria-ren aldeko argazkia aterako dute Larraulgo plazan (Gipuzkoa). Asteartean, berriz, mobilizazio eguna antolatu du EHEk, Euskal Herriko herri guztietan.