Barne Ministerioak neurri berriak hartzea espero du Aresek

Espainiako Barne Ministerioak presoen «gizarteratzea» lortzeko hasiko duen plana babestu du Rodolfo Ares Herrizaingo sailburuak. Bide horretan neurri gehiago hartzea espero du Aresek,betiere «legeak ezartzen dituen baldintzak beteta, eta preso terroristak gizarteratzeko helburuarekin». Eusko Legebiltzarrean hitz egin du Aresek, UPDk egindako galderari erantzunez. «PPren gobernua aldatu egin da, lehen Zigor Kodea gogortzea defendatzen zuen eta orain eskuzabal jokatzen du», esan du UPDko Gorka Maneirok. Herrizaingo sailburuaren ustez, ostera, Barne ministerioaren neurriak «onak» dira eta gizarteratzearekin denek egin beharko lukete bat.