BERRIA Taldearen proiektuari buruzko informazioa emateko eta etorkizuneko lan ildoen inguruan iritziak trukatzeko, datorren larunbatean BERRIAk bere komunitateko kideekin lan saio bat egingo du Andoainen, Martin Ugalde Kultur Parkean, 10:00etatik aurrera. Harpidedunak, BERRIAlagunak, irakurleak... deitu ditu bilerara.
BERRIAk dio ez dela ohiko batzar bat izango zapatukoa. "Zure ziztada behar dugu kanpainaren orain arteko emaitzen berri emango dugu, BERRIA Taldearen egoera ekonomikoa zein den azalduko dugu, etorkizuneko erronkak... Baina, horretaz gain, BERRIAlagunen ekarpenak jaso nahi ditugu".
Euskarazko hedabideak komunitateko lagunei galdera batzuk helarazi dizkie deialdian:
- Nolakoa ikusten duzu hedabideen etorkizuna?
- Nolakoa izan behar du BERRIAk? Ari gara asmatzen?
- Posible izango da bideragarri egitea? Zein izan daitezke gakoak?
- Nola lor dezakegu BERRIAlagun gehiago izatea?
- Nolakoa izan behar du BERRIAlagunen parte hartzeak?
Larunbatera Andoainera ezin duenak azaldu, badu aukera ekarpena postaz egiteko, [email protected]-ra idatzita.
