Gaur urtebetera –2015eko abenduaren 6an– euskarazko egunkari nazionalak 25 urte beteko ditu (Egunkaria 1990-2003, Egunero 2003, BERRIA 2003-…), eta BERRIAk data seinalatu hori dela-eta prestatu du datorren urteko egutegia; hiru kazeten azalak ageri dira. Egutegiarekin batera (6 euro), irudi berarekin koaderno bat ere egin du (4 euro). Egunotan Durangoko Azokan eskuratu ahal dira, BERRIAren postuan: Barrenkale 24 eta 25 mahaietan.
BERRIAren hiru hilabeteko harpidetza (50 euro) eta BERRIAlagunaren urteko kuota (100 euro) ere egin daitezke azokako postuan, eta, halaber, 2015eko agenda (14 euro), GAL 30 urte liburua (20 euro), estilo liburua (10 euro) eta Mantangorri-ren DVD bilduma (15 euro) erosi ahal dira –BERRIAlagunek, merkeago–.
Durangoko Azokan kazetaren produkturen bat eskuratzen duten guztiek saria eramango dute, hiru mila saritik gora banatuko baititu kazetak. Sariez gain, landetxe bateko asteburuko egonaldia zozkatuko du erosle denen artean.
Bestetik, Badok BERRIAren Euskal Musikaren Atariak smartphone-tarako aplikazioa aurkeztuko du gaur, Durangoko Azokako areto nagusian, 19:30etik aurrera. Ekitaldian Martxelo Otamendi BERRIAko zuzendariak, Jon Eskisabel Badok-eko arduradunak eta Pello Urzelai BERRIAko IKT arduradunak hartuko dute parte.
