Bi orduko lanuztea dute gaur metroan, hurrengo asteko manifestazioaren aurretik

Bi orduko lanuztea egingo dute Bilboko Metroko langileek gaur goizean, 05:45etik 07:45era. Enpresak jakinarazi du ordu tarte horretan hiru trenetik bat eskainiko dutela. Sindikatuen arabera, akordio bat lortzea «zaildu» egin du langileen soldata izoztea erabaki izanak. 2011ko soldataren zati bat itzultzeko agintzea zuzendaritzaren «mendekua» dela uste dute sindikatuek. Hurrengo ostegunerako egindako lanuzte deialdiak bere horretan jarraitzen du, eta manifestazio bat egingo dute. Asteartean, berriz, elkarretaratzea egingo dute Bizkaiko Batzar Nagusietan; alderdi guztiei idatzi bat ematea da sindikatuen asmoa. Herenegun, Bizkaiko Foru Aldundiaren aurrean egin zuten elkarretaratzea, eta, joan den astean, Bilboko Metroaren egoitzaren aurrean.