Bilboko Aste Nagusian "prozesu demokratiko baten alde" manifestatzera deitu dute

Arantza Urkaregi eta Tasio Erkizia ezker abertzaleko kide ezagunek aurkeztu dute ekimena, baina herritar talde baten izenean ari zirela nabarmendu dute: konponbidea posible dela uste dutenez etxean ezer egin gabe geratzeko prest ez dagoen herritar talde baten izenean.

Ildo horretatik, herritar bakoitzari Euskal Herriko gatazka konpontzeko zerbait egitea dagokiola iritzi dio Urkaregik, "behingoz modu demokratikoan konpondu ahal izan dadin".

Erkiziak, berriz, kritika egin die EAJri eta PSE-EEri: etsipenaren diskurtsoa zabaltzen aritzea leporatu die, ate guztiak itxita daudela eta ezer egiterik ez dagoela adieraztea. Aitzitik, prozesua suspertzea posible ez ezik, ezinbestekoa dela nabarmendu du Erkiziak, eta nahi horretan kokatu du manifestazioa.

Abuztuaren 24rako egin dute deialdia, eguerdiko hamabietarako, Plaza Eliptikoan. Konponbidea gure esku. Autonomia eta erabakitzeko eskubidea izango da manifestazioaren leloa.