Bizko Aste Nagusiari gero eta ordu gutxiago gelditzen zaizkio amaierako kanpaia jotzeko, baina ordura arte, Bilboko kaleak musikaz, kolorez eta jendez beteta jarraituko dute. Bilbainadekin, udal bandaren kontzertuarekin, bertsoekin eta herri kirolekin gozatuz esnatuko da hiriburua. Beroari eta ajeari aurre egiteko, gaztetxoentzat ur jolasak antolatu dituzte Uribitartean, eta piragua jaitsiera ekologikoa Ibaizabalen.
Eguerdian, lehiaketa gastronomikoa eta tripa betetzeko aukera. Gaur bakailaoa pil-pil erara prestatuko dute. Bakailaoaren Jauna izendatuko dute gainera, eta aginte makila emango diote. Bertan izango dira txupinerak ere, urteroko bilkuran.
Antzerkiari dagokionez, Brasil eta Kataluniatik etorrirako Cabaret Elegance antzerki taldearen Elegants kale ikuskizuna izango da ikusgai Arriaga plazan (13:00ean eta 21:15ean), baita Circon Claxon taldearen Revolución industrial lana ere (13.30). Umeentxako ikuskizun berezia Gas plazan izango da: Joxe Mendizabalek Bilbo kantari eskainiko du.
Bilbo Hiria nazioarteko su festen txapelketak jendez beteko ditu gauero legez itsasadarreko ertzak eta Areatza eta Etxebarria parkeak. Zorte handiena dutenek, txalupa batera igota gozatuko dute Euro Bengale piroteknia Frantziako su etxearen emanaldiaz (22:45).
Suen burrunbatik, kontzertuen burrunbara. Areatzan gaupasa izango da Egan taldearen eskutik (23:15), The Stars From The Commitments taldearen emanaldia Plaza Barrian (23:30), Mariachi Continental de Mexico, Pergolan (23:30) eta Esne Beltza taldea, Karola gunean (00:00). Musika elektronikoak ere lekua izango du, DJ Luis Carlos del Pozo, Pergolan (23:00); DJ Koska, Karpagunean (23:00), eta DJ Elepunto, Euskalgunean (23:00). Pinpilipauxa konpartsan, bestalde, Star Glam eta Las Fellini taldeeen kontzertuak izango dira 00:30etatik aurrera.
Hiri krossa herrikoia
Jai giroan kirolak ere tartea baduela erakusteko asmoz, Aste Nagusia Hiri Krossaren XVI. edizioa egingo da gaur arratsaldean, 17:30etan, Areatzan. Aurtetik aurtera arrakasta handiagoa ari da lortzen ekimenak eta gaurkoan ere partaidetzak gora egingo duela aurreikusten dute konpartsek. Izen-ematea Interneten bidez egin da eta amaierako denborak ere Bilboko Konpartsen webgunean plazaratuko dituzte.
- 17:00. Pre-Benjamin, Benjamin eta Alebin neskak.
- 17:30. Haur, Kadete eta Gazteak neskak.
- 18:00. Elbarrituak.
- 18:30. Txupete eta Txikiak mutilak.
